الشروط والأحكام
آخر تحديث: 17 أكتوبر 2026
هذي الشروط تنظّم استخدامك لموقع tutorings.sa وتسجيلك في برامج Tutorings. لما تحجز محاضرة أو تسجّل في برنامج أو تستخدم الموقع، فأنت موافق عليها. كتبناها بأوضح لغة نقدر عليها، ولو عندك أي سؤال كلّمنا.
باختصار
- الضمان الذهبي: ما عجبتك أول حصة مباشرة؟ اطلب الاسترجاع خلال 24 ساعة منها، وفلوسك ترجع كاملة.
- تسجيلك يتأكد بعد الدفع، وأقرب بداية بعد 3 أيام من التسجيل.
- تقدر تجمّد برنامجك لين 14 يوم، بس بلّغنا قبلها.
- المواد والتسجيلات لتعلّمك أنت، وما تنشرها لغيرك.
من نحن وعلى وش تنطبق الشروط
Tutorings معهد إنجليزي أونلاين: حصص مباشرة 1-1 مع مدرّسين، وبرامج مثل تحضير الآيلتس والتقوية العامة ودورة ستيب مبسّط، ومصادر مجانية مثل المحاضرة التعريفية واختبار تحديد المستوى والمكتبة المجانية.
هذي الشروط تنطبق على الموقع وعلى كل برنامج تسجّل فيه من خلاله. وطريقة تعاملنا مع بياناتك موضّحة في سياسة الخصوصية، ولبرنامج الشركاء شروطه الخاصة.
بياناتك
- البيانات اللي تعطينا إياها لازم تكون صحيحة: اسمك وبريدك وجوالك، ومستواك في اختبار تحديد المستوى. عليها نرتب برنامجك ونتواصل معك.
- بريدك اللي تسجّل فيه هو اللي ننشئ لك فيه حسابك في التطبيق، فاختر بريد تستخدمه.
- لو عمرك أقل من 18 سنة، سجّل بموافقة ولي أمرك.
البرامج والتسجيل
- تفاصيل كل برنامج، مثل عدد الحصص ومدته وسعره ووش يشمل، موجودة في صفحته. واللي يظهر لك وقت التسجيل هو اللي ينطبق على تسجيلك.
- في البرامج المباشرة تختار ثلاثة أيام بالأسبوع بينها يوم فاصل، وساعة ثابتة بتوقيت الرياض، وتاريخ بداية بعد 3 أيام على الأقل من يوم التسجيل.
- قبل ما تسجّل في التقوية العامة سوّ اختبار تحديد المستوى، وسجّل في المستوى اللي يطلع لك.
- تسجيلك يتأكد بعد ما يكتمل الدفع، وبعدها نرتب لك المدرّس والجدول ونرسل لك تفاصيل الدخول.
الأسعار والدفع وأكواد الخصم
- الأسعار بالريال السعودي، والمبلغ اللي يظهر في ملخص تسجيلك هو اللي تدفعه.
- تدفع بالطرق المتاحة وقت التسجيل. ولو الدفع الإلكتروني مو متاح، يتواصل معك فريقنا ويرتب معك طريقة الدفع.
- لو تغيّر سعر برنامج بعد ما سجّلت، يبقى سعرك مثل ما هو.
- أكواد الخصم: كود واحد لكل تسجيل، والخصم يحسبه نظامنا وقت التسجيل. الكود ما يتحوّل لفلوس، ولنا نوقف أي كود في أي وقت. بعض الأكواد تخص شركاءنا ويحصلون على عمولة لما تستخدمها، وهذا ما يغيّر شي في سعرك ولا في خدمتك.
الضمان الذهبي والاسترجاع
البرامج المباشرة: الآيلتس والتقوية العامة
- الضمان الذهبي: ما عجبتك أول حصة مباشرة؟ اطلب الاسترجاع خلال 24 ساعة من نهايتها، ونرجّع لك المبلغ كامل بدون أسئلة. ولو سجّلت في أكثر من مستوى أو في الباقة الكاملة، الضمان يشمل المبلغ كله ويُحسب من أول حصة لك.
- بعد الـ24 ساعة المبلغ ما يسترجع، إلا لو ما قدرنا نكمّل لك البرنامج من طرفنا، وقتها نرجّع لك قيمة الحصص اللي ما أخذتها.
ستيب مبسّط (دورة مسجّلة)
- ما ناسبك المحتوى؟ اطلب الاسترجاع خلال 7 أيام من اشتراكك، ونرجّع لك المبلغ كامل. بعدها ما يسترجع.
كيف تطلب الاسترجاع
- راسلنا على [email protected] أو على واتساب مع رقم طلبك (يبدأ بـ TS-).
- نرد عليك خلال 3 إلى 5 أيام عمل، ونرجّع المبلغ بنفس طريقة الدفع. ومتى يوصل حسابك يعتمد على البنك أو مزوّد الدفع.
التجميد والغياب والمدرّس
- تقدر تجمّد برنامجك لين 14 يوم لو سافرت أو انشغلت، بدون ما تخسر حصصك. بلّغنا قبل ما يبدأ التجميد.
- مدرّسك ثابت طول المستوى، ولو ما ناسبك تطلب تغييره بدون رسوم.
- لو بتغيب عن حصة، بلّغ مدرّسك أو فريقنا قبلها بوقت كافي عشان نرتب لك موعد بديل. والحصة اللي تغيب عنها بدون ما تبلّغ ممكن تنحسب عليك.
- بعد كل حصة مباشرة تنزل لك نسخة مسجّلة منها في التطبيق للمراجعة.
المحاضرة المجانية واختبار المستوى والمكتبة
- المحاضرة المجانية: لقاء تعريفي قصير بدون رسوم ولا التزام. نرسل لك الرابط بعد ما يتأكد موعدك، وتقدر تلغيه أو تغيّره بالتواصل معنا. ولو صار عندنا ظرف وغيّرنا الموعد، نبلغك قبلها.
- اختبار تحديد المستوى: نتيجته تقدير لمستواك يساعدك تختار البرنامج المناسب، وما تغني عن الاختبارات الرسمية مثل IELTS وSTEP.
- المكتبة المجانية: المصادر لاستخدامك الشخصي، وبعضها من جهات ثانية تخضع لشروط أصحابها.
الاحترام والمحتوى
- الاحترام أساس، في الحصص والرسائل ومع المدرّسين وفريقنا. الإساءة أو المضايقة توقف خدمتك بدون استرجاع.
- ممنوع تنشر الحصص أو تسجيلاتها، أو تشارك حسابك في التطبيق مع غيرك.
- المواد والكتب والتسجيلات ومحتوى الموقع والتطبيق ملك لـ Tutorings أو لأصحابها اللي رخّصوا لنا فيها. لك تستخدمها لتعلّمك، وما تبيعها ولا تنشرها ولا توزّعها.
النتائج وحدود مسؤوليتنا
- نجهزك ونتابعك بجد، بس ما نضمن درجة معيّنة في IELTS أو STEP أو غيرها: النتيجة تعتمد على التزامك ومستواك ويوم اختبارك.
- الحصص تعتمد على أدوات خارجية مثل منصات الاجتماعات والتطبيقات. لو صار فيها عطل خارج عن إرادتنا، نرتب لك بديل.
- في كل الأحوال، مسؤوليتنا تجاهك ما تتجاوز المبلغ اللي دفعته في البرنامج المعني.
تحديث الشروط
نحدّث هذي الشروط لما تتغيّر خدماتنا أو الأنظمة، والتاريخ فوق يوضح آخر تحديث. اللي كان منشور وقت تسجيلك هو اللي ينطبق على هذا التسجيل.
النظام المطبّق
هذي الشروط تخضع لأنظمة المملكة العربية السعودية. أي خلاف نحاول نحلّه بالتفاهم أول، وإذا ما انحل فالمرجع المحاكم المختصة في المملكة.
تواصل معنا
- البريد: [email protected]
- واتساب: واتساب
- الجوال: +966 56 069 1059